Parashat Bereshit 5783

 BERESHIT, 5783

Le’ilui Nishmat Yoel Lhanghal Ben Batsheva, Avner Haokip Ben Avraham, Khana Lhanghal Bat Sarah, Ngahlhing Bat Sarah. Tihyeh Nishmatam Tzrorah Bitzror Hakhayim

וַיֹּאמֶר קַיִן אֶל־יְהֹוָה גָּדוֹל עֲוֺנִי מִנְּשֹׂא

Vayyomer Kain el H’ gadol avoni minneso…

(Kain in P-thien jah a “kachonsetna hi pohjou huoi ahipoi” ti’n asei e …) ~ Bereshit 4:13

Rashi Hakadosh in Midrash Rabbah a Khazal ho thusei pansan’a hiche pasuk ahilchetna a hitin asei e. Hilai mun’a Kain thusei hi adang ahipo’n P-thien heng’a hitahi dohna asem’a ahi,”Kachonsetna hi pohjou huoi hilou a ham? Kachonsetna hi gih vaal’a ngaidam jou huoi hilou dan ham? P-thien nangma’n van le leiset jieng bon nakhan/napoh jou’a ahileh, ipi ding’a kasuhkhelna hi nakhan/napoh joulou ding a ham? “. 

Ivet’a ahileh Kain hin asopipa Hevel atha nung jieng’a jong kisihna ima aneilou’a, chubep hilou’a asuhkhel-achonsetna toh kitoh’a P-thien in achung’a gotna apeh kigot jieng jong vaal asah’a “complain” abol toh kilou jojen a ahi. Hinlah Ramban in aseina a hilai mun’a Khazal ho min’a Rashi Hakadosh in Kain thusei asei pauhi adang ahipo’n, P-thien ang’a Kain in kisihna neitah’a achonsetna phondohna anei’a, P-thien kasuhkhelna hi ngaidam channa thei hilou dan ham ti’a adoh a ahibou e ti’n ahilchien e.  

Gemara Masechet Sanhedrin Daf 101b mun ivet’a ahileh Khazal ho’n hitin asei uve: Shlosha ba’u ba’alilah; ellu hen – Kain, Esaiv u’Menashe. Kain diktiv “gadol avoni minneso”. Amar lefanaiv ribbono shel olam klum gadol avoni mi’shishim ribo sheatidin lakhto lefaneikha ve’attah soleakh lahem... (Esaiv toh Menashe Lengpa chungchang chu Gemara aban ivetbe le akisun na’n hinlah eiho’n iseinom pipen u ahilou jeh in Kain chungchang kisun bou veuhite )  

Eipao’a sei ding hileh mi 3 – Kain, Esaiv le Menashe lengpa ho’se hi P-thien heng’a ahung uvin; jonchih tah in thil ahung thum uve. Kain in ahileh tuchung Parasha a “gadol avoni minneso” ti’a kisun ma bang in P-thien heng’a hitin asei e,”khonung’a mi 600,000 ho chonsetna (khet ha’egel kiseina) jieng bon nangaidam thei’a ahileh iti dan a kei suhkhelna hi nangaidam theilou ding’a ham?”.  Rashi in hiche gemara a Khazal ho thusei “ba’u ba’alilah” ahilchetna a Kain, Esaiv le Menashe lengpa hohin P-thien heng’a tao’a thum tah sang in koima’n aniel jolou ding thil pansahna in akihol uvin, jonchih tah in “demand” ahung boltho uve.   

Chuti ahiding leh abul lang’a inasei bang uva Kain chun kisihna aneilou toh kilou kit a ahi.  Langkhat a akisihpoi iti ding jong leh  Midrash Rabbah mundang a Khazal ho’n aseinauva Kain chun asopipa Hevel athana chung’a kisihna anei in, chubep hilou’a apa, Adam Harishon suhkhelna sang’a ama chonsetna asangjoi ti’n phondohna (confession) jong anei nalai e ti ahiye. 

Cain in tshuva anei e ti mudohna thei kit khat chu Midrash Bereshit Rabbah 22:13 mun a Khazal ho’n hitin asei uve: Adam Harishon in Kain akimupi chun ajah a hitin adong e,”Nachungthu iti kitan’a hinam?”. Kain in apa jah a “Tshuva kanei in ahileh kasuhkhelna jeh’a kachung’a lhung ding gotna jong suhniem in aum e” ti’n adonbut e. Chuphat chun Adam Harishon in jong “Tshuva in chuchan a chu tha anei na…” ati in, “mizmor shir leyom hashabbat” ti’n vahchoi-la asa’n ahi.

Ahileh tu’n veleuhen Gemara a Khazal ho sei dungjui’a Kain chun kisihna aneilou toh kilou; langkhat a Midrash dungjui’a ivet ding uleh asuhkhel chung’a kisihna anei dan a Khazal ho’n asei kit uva ahi. CHuti ahileh Khazal ho amaho le amaho kikal a hiuvin tem? 

Torah Temimah in aseina a hilai mun’a hin stira (akikal) ima aumpoi. Mihem in suhkhel-bolkhel anei tieng achonsetna’a kuon ngaidam achanna thei ding’a lampi ni anei a ahiye. Khat ahileh tshuva anei’a koun hi’a; khat ahikit leh galut a ache’a kuon ahi. Gemara a Khazal ho’n Kain chungchang aseinauva kisihna aneilou dan’a asei uhi adang ahipo’n, galut in mihem suhkhel-bolkhel le chonsetna ho ichan’a thoidamna thei tha anei em ti avetsah nuom jeh u ahi’n; langkhat a Midrash a Khazal ho’n Kain in kisihna anei dan’a asei uhi adang ahipo’n tshuva in ichan a tha anei’a, mihem chonsetna ho jieng jong asopthieng jou em ti eihil nuom jeh u ahikit e.  

Torah Temimah in aseina a hiche hi hoi’a kuon kimudoh thei em itileh, Gemara Masechet Sanhedrin Daf 37b mun’a Khazal ho’n “galut mekhaperet avon meketzah” (galut in chonsetna akeh khat athoidam e) ti’n asei uve. Hichu Kain a kuon ajildoh uva ahiye. Chulai mun’a Khazal ho’n Kain chungchang a drash apehnauva hitin asei uve, “Kain gotna pipen chu munkhat’a lungmongsel’a khosa theilou ding, chuta chu phatseh leh kichuon jieng ding. Chu’a kuon a chu Galut in mihem suhkhel-bolkhel le chonsetna ho athoidam thei e ti akimudoh e”. Hiche Gemara a achepiu shita (galut in chonsetna athoidam thei) pa dungjui’a Daf 101b mun’a jong asei uva ahi. Langkhat a Midrash Vayikra Rabbah, Perek 10 mun ivet leh Khazal ho’n “tshuva mekhaperet avon mekhetza” ( kisihna in mihem chonsetna akehkhat athoidam e) ti’n asei uve. Chuta chu hiche Midrash a asei u shita (tshuva in chonsetna athoidam thei) toh kitoh a Bereshit Rabbah a jong asei uva ahi. 

Chuti ahileh Khazal ho thusei kikal a ahipo’n, hiche shita teni atahlah nuom jeh uva munkhat a chu kisihna neilou dan a asei uva, mundang khat a kisihna nei dan a asei uva ahijoi. Chuleh hiche tshuva le galut teni ahung umkhom tieng chonset thoidamna chu bukim pan ji a ahi. 

Aipi hileh iseima bang uvin Kain chungchang’a Khazal ho’n Gemara Masechet Sanhedrin a aseipau leh Midrashim ho’a aseipau stira ahilou dan akichehtai. Langkhat a lungdon umtah, chunglang’a Midrash Bereshit Rabbah a Khazal ho thusei toh kisai’a doh thei khat aum e. Ipi atileh Kain in tshuva anei jeh’a kuon a Adam Harishon in “hichan a chu Tshuva in tha anei ham” ti’a asei a, chujou’a chu “Mizmor shir leyom hashabbat…” (Tehillim 92) ti’a thangvahna-la ahin sah a hintem? Kain in tshuva ananei lou hileh Adam Harishon in tshuva in ichan a tha anei a ham ti ahetlou ding dan a ham? Chuleh hiche Tehillim 92 – Mizmor shir leyom hashabbat hi’n tshuva toh ipi kimatna anei a Adam Harishon in hiche thangvahna-la hi asah a hintem?

Khazal ho’n aseinauva Tehillim bung 92 hi Adam Harishon in anasem a ahiye ti ahi. Tehillim a thangvahna-la hokhu abon’a Leng David sem ahipo’n; Khazal ho’n aseinauva mi 10 tah in asem uva ahi. Hiche mi 10 lah’a chu Adam Harishon jong jao’a chuleh aman anasem thangvahna-la chu Shabbat ni, Kabbalat Shabbath tieng isah ji’u hiche Mizmor Shir leyom Hashabbat hi hi’a ahiye. 

Ahileh tu’n i-kushiya hilchen kigo leuhen. Rabbeinu Yehonatan Eibeshitz in mefarshim ho pansan’a aseina a chonsetna jat-jat um jong leh hiche chonsetna holah’a amelse pen tithei thil 3 aum in ahi. Chuche hochu shfikhut damim - thisan so, avodah zara - Milim semthu hou, chuleh gilui arayot - jon-thanghuoi  ho ahiuve. Khazal ho’n aseinauva hiche thil 3 ho’a hi “yehareg velo ya’avor” – tichu iham ti’a Yehudi khat chu “hiche chonsetna 3 ho nabol lou’a ahileh nathi ding ahi” ti’a akigih tah’a ahijong leh hiche 3 ho abol sang’a thina joh akilhen ding ti ahi. Chuleh koi hileh hiche chonsetna 3 ho boldoh a chu tshuva jieng in jong asuhkhelna ho amoh sopthieng joulou a ahi ti ahinalaiye. 

Tehillim 90:3 ivet leh hitin akisun e: teshev enosh ad daka (תָּשֵׁב אֱנוֹשׁ עַד־דַּכָּא). Hilai mun a דכא  hi kli Yakar in aseina a rashei tevot Dam, Kefira le Isha (tichu dam- thisan so,kefira -  milim semthu hou le isha – jon-thanghuoi) hiuva ahi. Teshev enosh ad daka (“daka” changei’a mihem kinungle thei nalai ti’a ledoh ding dan ahi) kiti chu ipi kiseina ham itileh hiti ahi: mihem kiti chu hiche “daka” in avetsah chonsetna 3 ho tilou se’a P-thien heng’a kinungle theinalai, hinlah hiche 3 ho’a chonsetna anei kalse tshuva nei jieng jong leh P-thien heng’a moh kinungle jou jilou a ahitai.

Adam Harishon anachonsetna chu adang ahipo’n hiche 3 holah’a khat, kefira chu ahiye. Khazal ho’n aseima bang uva Adam Harishon chu kofer (P-thien aumpoi ti’a pom) hi’a ahi. Ajehchu P-thien aum mong nai ti’n anatahsan taleh theiga chu ananehlou hiel ding’a ahiye ti’n asei uve. Chuti ahileh theiga aneh’a kuon a chu milim semthu hou toh thakhat tina ahitai. 

Langkhat a  Khazal ho’n Gemara Masechet Shabbat Daf 118b mun a hitin asei uve: Koi hileh Shabbat nikho ahiding bang tah’a nit a chu, Enosh khang ho bang’a milim-semthu ahou uva ahijong leh achonsetnau kingaidam peh ding’a ahi. Chuti ahileh hilai’a kuon kimudoh chu Shabbat in ichan a tha anei a ham ti ahiye.

Hinlah chunlang’a isei dungjui uva ivet’a ahileh hiche chonsetna 3 ho bolkha a chu Tshuva jieng in jong achonsetnau asopthieng joulou ding dan’a kisei a ahi. Adam Harishon jieng in jong ama suhkhelna Kefira chu tshuva jieng in jong asopthieng joulou ding dan’a anagel a ahiye. Hinlah hetding chu Kain suhkhelna jong chu hiche chonsetna 3 holah’a khat, shfikhut damim – thisan so hi’a, hijieng jong leh P-thien in tshuva le galut a kuon a angaidam peh a ahikit e. 

Rabbeinu Yehonatan Eibeshitz in aseina Kain in asopipa atha jou’a tshuva le galut a kuon P-thien in achonsetna angaidam peh thu Adam Harishon in ahetphat a amasuhkhelna, avoda zara jong chu ngaidam ahinathei ding lampi umtei ding ahi ti’n ahin hetdoh a; chuleh hiche ngaidam channa thei ding lampi adang hilou’a “Shabbat ahiding bangtah’a nit a kuon ahi” ti’n ahin mudoh a ahi. Chuti ahitoh kilhon a “Mizmor shir leyom hashabbat…” ti’a thangvahna-la chu ahin sah a ahiye.  r

SHABBATH SHALOM LEKULAM 

SIMKHAT TORAH/VEZOT HABERAKHA, 5783

 SIMKHAT TORAH/VEZOT HABERAKHA, 5783

Le’ilui Nishmat Yoel Lhanghal Ben Batsheva, Avner Haokip Ben Avraham, Khana Lhanghal Bat Sarah, Ngahlhing Bat Sarah. Tihyeh Nishmatam Tzrorah Bitzror Hakhayim

יְהוָה מִסִּינַי בָּא וְזָרַח מִשֵּׂעִיר לָמוֹ הוֹפִיעַ מֵהַר פָּארָן..

Ad-nai mi’Sinai ba, vezarakh mi’Seir lamo, hofia mihar Paran…

(P-thien chu Sinai a koun ahung in, Seir a kuon achung u ahin salvah in, Paran a kuon ahung kilah in …) Devarim 33:2

Midrash Tankhumah a Khazal ho’n aseinauva P-thien in Am Israel te Torah apeh masang chun namtin-vaipi jouse heng’ah ache in, Torah akisaan ding uvin agajol e. Hinlah khatcha’n anakisaan nuom pouvin ahi. Achaina’a Am Israel te heng’a ahung leh ipu-ipa teu chun “na’aseh venishma” ti’n Torah chu anakisaan uve. 

Ahileh P-thien in Torah chu namtin-vaipi jouse peh ding ago e tichu hoi’a kimudoh thei em? Tuchung Parasha kisun ma bang’a “Seir akuon” kiti chun Esav suon le pah ho avetsah a ahiye (Seir mun chu Esav suon le pah ho anachen masatna mun u ahiye). Chukit leh “Paran akuon” kiti chun Ishmael suon le pah ho avetsah ah ahi (Bereshit21:21 ve’n Ishamel chu Paran mun ah acheng’e ti kisun ding ah ahi). Hiti’a chu P-thien in namtin-vaipi jouse jah’a Torah chu akisaan ding uva agajol a, hinlah Am Israel te tilou adang khatcha’n anapom pehlou uva ahiye. 

Gemara Masechet Avodah Zarah 2b mun ivet leh tu’a isei u, Midrash Tankhumah a kisun tobang chet chun jong akisun in; Sifre lekhabu a jong Khazal ho’n chutima chun asei uvin; Chujong leh Rashi hilchetna ivet leh Khazal ho thusei ho pansan in chutima chun hilchetna ape’n ahi.

Hinlah lungdon umtah khat chu Khazal ho seima bang’a P-thien chu namtin-vaipi jouse heng’a che a, Torah akisaan na ding uva agajol a ahitah leh ipi ding’a Torah in Esav le Ishmael teni suon le pah ho bouseh ahin minphah a hintem?

Chukit leh hilai mun’a hetthiem hahsa tah khat chu athi ma’a Moshe Rabbeinu in Am Israel te phatthei abohna ding’a chu ipi atileh Torah kipeh chungchang thu avel’a ahin sei kit a ahidem? Tidan chu ipi atileh Am Israel te phatthei aboh masang’a ipu-ipa teuvin gamthip-gam a Torah anakisaan dan thu uva chu ahin pat khel khel a hintem? Torah kipeh toh phatthei kibohna hin ipi kimatna anei a ham?

Kushiya masapa chu Maharal Mi’Prague in alekhabusut Gur Aryeh ah adong in, hiti hin hilchetna ana pe e: Khazal ho’n aseima bang uva P-thien in Torah chu namtin-vaipi jouse heng’a achoi a, akisaan ding uva agasei sohkei ah ahiye. Chutilou hileh khonung tieng leh P-thien heng’a hung uva thiem hung kichan go diu,”Israel te bang’a keiho jong Torah neipeh mo uva ham” ti’a ahung sei diuva ahi. Hinlah hatchungnung P-thien, thilsoh jouse le asoh ding jouse abul a pat achaina gei mumasapa chun namtin-vaipi ho chutobang’a thiem ahung kichan diu chu ahet toh kilhon a, akam u hupbitna ding’a Torah chu namtin-vaipi jouse anapeh kigot a ahiye. Hijeng jong leh khatcha’n jong kisaan ding anago pouve.  

Chuti ahileh ipi ding’a Esav le Ishmael suon le pah ho hieng’a P-thien in Torah agapeh kigot bou chu Torah a kisun ah hintem? Ajehchu amaho jong Am Israel te bang’a Avraham Avinu suon le pah ahijeh uva ahi. P-thien in mihem te Torah peh ding agot a chu namtin-vaipi jouse heng’a che masa’a Torah chu agapeh kigot leh khatcha’n anadei lou uva ahi. Achaina in, Avraham suon le pah ho heng’ah kiche leh apu pauvin Torah jouse aboncha anasuhbulhit utoh kilhon in amaho’n jong kisaan tei nauvin te ti’a aheng uva hung a ahiye. Hinlah Avraham Avinu a kuon ahivang uvin Esav le Ishmael suon le pah ho chun namdang ho bang in Torah chu anakisaan nuom kit deh pouvin ahi. 

Maharal Mi’Prague in hitin dohna asembe kit e: chuti’a Avraham Avinu suon le pah ahijeh uva amaho Torah kisaan lou khel-khel chu atumbeleh a Torah in ahinsut ahi iti diu leh Avraham Avinu in cha-le-nao adang tamtah jong anei ah hilou ham? Ipi atileh Ishmael le Esav teni akuon hung peng ho khel khel kiminphah a hintem? 

Maharal Mi’Prague in ahilchetna a ajehchu Ishmael le Esav teni hin Avraham Avinu suon-le-pah dang ho sang’a gachungchonna chuom aneilhon ah ahi. Khatna a Ishmael chu Hagar akuon hijieng jong leh Avraham Avinu chapate ho lah’a Brith kibol masapen anahiye. Chuti ahileh adang ho sang’a thienthouna khat aganeichuom ding tina ahi. Nina a, Esav ahikit leh Ishmael banglou in apenna - anu le apa anilhon a Tzaddik hikit lhon a ahi. Hijieng jong leh lhagao lang’a chuchan gei’a thienthouna ganei a, nampi-vaipi dang dang toh kibanglou ding a kikoi Esav le Ishmael suon le pah teho jieng jong chun Torah chu akisaan nuom tapouve. Chuti’a Avraham Avinu a koun hung pengdoh nampi ni teni jieng jong chun Torah akisaan nuomlou uva ahileh namtin-vaipi dang dang ho chun Torah akisaan nuom lou ding’u hetsa ahi ti vetsahna a hiche namtin-vaipi teni in Torah akisaan nuomlou pau chu Torah a hung kisun khel khel ah ahi. Henge, P-thien ache’n, namtin-vaipi jouse heng’a Torah chu akisaan ding uvin agajol e; Chujong leh khat jieng cha’n jong akisaan nuompouve. Hijieng jong leh asaang ding’a kilawm teni in ahin kisaan  nuomlou lhon lou pa chu adang-dang ho sang’a Torah in atahlah nuom dehset a ahiye.

Ahileh Kushiya masapa ihilchet uva ahitah leh Kushiya nina pa la ahilchetna ipi hitan tem? Harav Yakov Khayim Sofer, Baal Kaf Hakhayim in alekhabusut Yismakh Israel kiti a chun hiche i-Kushiya pauhi adong in, hilchetna ni tah ape e. 

Hilchetna masapa chu ahileh hiti ahi. Mikhat chung’a thilpha ahung lhun ding tieng khatvei-vei leh midat hadin pachu ahung kigol ji’n, hiche mipa/minu chu phattheina chang ding’a lawm ah hinam ti khuolchina ahung nei ji e. Iham ti’a midat hadin chu athanei joh’a, achung a kitrug ahung che khah tah leh, achung’a thilpha lhung ding lai khat jieng jong chu lhung lou a um jieng thei ah ahi. Chuti ahitoh kilhon a Kitrug (hehsetna) chena lou ding leh, phattheina pa ahiding bang tah’a alhun theina ding a mikhat chu Brakha ibol ding leh amasapen’a athilpha bol ho sei’a, pachatna peh ding, chujou tieng leh phatthei boh bep ding ahiye. Hiche hi koi chung’a kimu em itileh ipu u Yitzkhak Avinu in Yakov Avinu phatthei aboh ding’a chu “veuvin kachapa nam hi Gan Eden nam anam e” ti’a aseiphat masat a, chujou a chu phatthei aboh bep ah ahi.   Chuma bang’a Moshe Rabbeinu in Am Israel te phatthei aboh ding’a chu pachatna thu asei masat a, chuleh chuche na ding’a chu thildang dang sang’a namtin-vaipi jouse anakisaan nuomlou u Torah anakisaan thu uchu ahin phahpoh a ahiye. Chuti’a chu chunglang’a Kitrug che ding pa atuh taang a, aban a Brakha pa chu apeh a ahi.

Hilchetna nina pa chu ahikit leh hiti ahi. Parasha ivet leh “vezoth haberakha asher berakh Moshe” ti’a kipan ah ahiye. Moshe Rabbeinu in Am Israel te phatthei aboh thu abul bul a kisun pei ah ahi. Hinlah aban isim be leh “Sinai a kuon P-thien ahung in…” ti’a Matan Torah thu hung kisei a, chujou bep a chu Brakha pachu aba’n hung kisunjom kit ah ahiye. Hichun ipi avetsah a ipi eihil nuom uva ham itileh Phattheina dihtah pa kisaan theina ding’a lampi umsun chu Torah a kidii a Mitzvot ho’a kisahboi pa bouseh chu ahiye ti ahi. 

Ipu-ipa tehou chu ivet a ahileh Avraham Avinu hihen, Yitzkhak Avinu hihen, Yakov Avinu jieng jong hitaleh P-thien in phatthei anaboh a, aheng uva kitepna anasem lou koima aumpoi. Chubep hilou’a ipu tehou 12 Shevatim ho jouse jong Beracha anachang sohkei uva ahiye. Hinlah chuche man’a chu khattou in “phatthei boh changsa kahita’n keima dei-dei in chon ing katin, kadei dei bol jong leh kapu-kapa te chung’a phatthei kiboh pa chun eiven jing’a, eichin jing ding ahi” ti’a lunggel anei a, amanop dan tah’a hinkho aman thei tina ahidehpoi. Torah sung mun ijat ham’a kisun ma bang’a (Parashat Bekhukotai, Parashat Re’eh le mun dang dang) Torah  ve’Kiyum Mitzvot ho aumlou a ahileh ipu-ipa tehou chung’a P-thien in phattheina le vangbohna ananei hochu eiho chung’a cheng dehlou ding a ahiye. 

Simkhat Torah ahung lhun kit tah toh kilhon in P-thien in ilungsung cheh uva Torah hettheina le ngailutna dihtah pa chun eihin phungvuh uhen lang; chuleh akoi akoi hileuhen i-umna mun jouse uva Torah pachu ahiding bang tah’a ikipapi uva, loupi tah’a ilop theina ding uvin P-thien in phatthei eiboh tauhen.

KHAG SAMEKAH VE’SHABBATH SHALOM LEKULAM        

Parashat Ha'azinu

 Le’ilui Nishmat Avner Ben Avraham, Khana Lhanghal Bat Sarah ve’Ngahlhing Bat Sarah. Tihyeh Nishmatam Tzrorah Bitzror Hakhayim

יַעֲרֹף כַּמָּטָר לִקְחִי        

”Ya’arof kamatar lik’khi”

(Kahilna hi gotwi bang in hung lha hen lang…)

                                   ~ Devarim 32:2

P-thien lunglam ahinah leh tu ahung lhung ding hapta a hi Lhamboh Kut ti’a eiho’n iminvo u Khag Succot kipan ding a ahitai. Hiche Khag Succot toh kisai hin tu eiho khang’a Mitzvot 3 – Succah a cheng ding; Arba’at Minim chuleh Simkhat Hakhag (Kut a kipa ding) - inei uvin ahi. Kut jouse’a kipa ding ti hijieng jong leh Khag Succot a kipa ding tihi Torah in mefurash tah’a ahin sut a ahitoh kilhon in Kut dang-dang ho sang’a hiche Kut a kipa ding hi aloupi le apoimo dehset e. Chuleh Succot a kipa ding thupeh a kuon’a hi Kut dangho’a kipa ding thupeh jong kijildoh son’a ahikit uve.

Hiche Mitzvot 3 tu’a iminphah houhi iseima bang uva tu eiho khang’a thupeh poimo cheh ho ahiuve. Langkhat’a Beith Hamikdash anadin lai chun tu’a isei’u Mitzvot ho chungchon a Mitzvot 2 -  Mitzvat Aliyat Laregel (Jerusalem khopi a che a P-thien ang’a gakilulah ding) le Mitzvat Nisuk Hamayim (twi a kilhaina)  jong anaum nalai in ahi. 

Masechet Rosh Hashana, Perek 1, Mishna 2 mun a Khazal ho’n aseima bang uva “bekhag nidonin al hamayim” – Khag (tichu Succot) tieng twi (gotwi kiseina) toh kisai thutanna aum ji’n ahi ti ahiye. Tidan chu kumkhat sung’a gotwi hoi’a pha’a ding hinam, ahilouleh gotwi phalou’a twi lhom ding ham ti Succot lai leh chunglang Beit Din a thutanna aum ji’n ahi. Chuti ahitoh kilhon a kumthah chu kumpha-kumhoi ahi’a, go phatecha’a ahung juh’a twi anieng na ding in Succot tieng hiche nisuk hamayim – maicham mun’a twi’a kilhaina hi anaum ji’n ahi. 

Nisuk hamayim aumtahlou vang in tu eiho khang in jong gotwi phatna ding’a hazjkara hi Succot ni 8 ni, ahilouleh Sh’mini Atzeret a kuon akipan ji ta’n, “mashiv haruakh umorid hageshem” akiseipan jitai. Masechet Ta’anit ivet leh Mishna masapen a hiche “mashiv haruakh umorid hageshem” toh kisai hin Rabbi Eliezer le Rabbi Yehoshua kikah’a makhloket aum in. Rabbi Eliezer in Succot ni masani a kuon seipat ding ati’n; Rabbi Yehoshua in ahileh Sh’mini Atzeret apat seipat ding ti’n asei e. Halakha chu ihetma bang uvin Rabbi Yehoshua tobang ahi’n, ni 8 ni’a kipat kiseipan ji a ahitai. 

Gojuhna ding’a thumna/taona – veten tal umatar livrakha (Barekh Aleinu taona) ahileh vang Succot Kut mang’a hung’a, Jerusalem mun’a kilulah ho ding gelna’n Kheshvan lha tieng akiseipa’n ji’n ahi. Aipi hileh “mashiv haruakh umorid hageshem” hi ahileh taona/thumna chet ahilou vang’a gotwi phatna ding’a P-thien lungholna/suhlunglhaina (Ivrit a “kedei leratzot H’ “ ) ding’a kisei masa ji’a ahiye.  

Ahileh hiche “mashiv haruakh” hi Succot ni masapen a pat sei ding ahiti Rabbi Eliezer Hagadol in hoi’a kuon ahin jildoh em itileh Gemara in ngaidan ni ape’n; Khat chu Nisuh Hamayim a kuon hinte ti ahi’n; khat kit chu ahileh Netilat Lulav a kuon hinte ti ahi. CHuta chu Succot a thupeh inei hou toh hiche Mashiv Haruakh hin kimatna ahin neipeh a ahiye. 

Ahileh hiche “Mashiv Haruakh…” hi Tefillat Shmona Esre sung’a hoilai mun’a kisei ji em? Brakha nina – Birkat Tekhiyat Hametim a khun akisei ji’n ahi. Ipi atileh Brakha dang hiloui’a hiche Birkat Tekhiyat Hametim khel-khel a chu kisei a ahidem?

Masechet Ta’anit Daf 7a mun a Rabbi Abbahu le Rav Yosef kikah a makhloket aum in. Rabbi Abbahu dungjui’a thokit-ni sang in gojuh-ni aloupi joi; ajehchu thokit-ni hi Tzaddikim ho’a ding bou ahi’n hinlah gojuh-ni ahileh vang Rashayim ho jieng in jong aphatchompi uve ti’n asei e. Langkhat a Rav Yosef in aseina’a thokit-ni hihen gojuh-ni hi hitaleh, anigel lhon in aloupi dan lhon kibang e; Chuti ahitoh kilhon a Birkat Tekhiyat Hametim mun’a Mashiv Haruakh kisei a ahi ti’n asei e. 

Tuchung Parasha ivet leh Torah a hitin akisun e: Ya’arof kamatar lik’khi – kahilna hi gotwi bang in hung lha hen… 

Gemara Masechet Ta’anit Daf 7a mun ivetbe’a ahileh hiche pasuk toh kisai hin Khazal ho kikah’a makhloket tamtah aum in. Chuche holah’a khat chu Rav Yehuda le Rava kikah a makhloket jong ahiye. Rav Yehuda in aseina a Torah kipeh nikho toh gojuh nikho aloupi dan akibang e ati. Hoi’a kuon ajildoh em itileh “likkhi - kahilna” – Torah kiseina – hi gotwi bang in hung lha hen ti’a kuon ahi. Mishlei 4:2 mun a “ki lekakh tov natati lakhem Torati al ta’azovu” a kuon mudoh thei chu “kihilna” kiti chu Torah kiseina ahibou e ti’n Rav Yehuda in asei e. 

Langkhat a Rava in ahileh hiche pasuk pa pansan mama’n hitin asei e. Torah kipeh nikho sang in gojuh nikho aloupi joi. Ajehchu thil kiti chu akitekah tieng alenjo mangcha’a tekhana kinei ji’a chule aneojo chu kiminphah ji a ahi. Chuma bang chun hilai pasuk a jong gojuh nikho aloupi joh jeh chun amachu tekahna in akimang in “Kahilna chu gotwi bang in hung lha hen” ti’a Torah ma’n ahin sut a ahiye. 

Hilai mun’a hin Maharsha ahung in chunglang’a Tikhiyat Hametim le Gojuh nikho toh kisai a Rabbi Abbahu le Rav Yosef kikah’a makhloket pa jong chu tu’a Rav Yehuda le Rava kikah’a makhloket patoh kibang’a ahi ti’n asei e. Rava le Rabbi Abbahu teni ngaidan le apansatna lhon chu kibang’a chuti ahitoh kilhon a Gojuh nikho chu thokitni chuleh Torah kipeh ni sang’a lenjo le loupijo a asei lhon a ahi. 

Aipi hileh hichan gei’a chu gojuh nikho chu loupi’a chuleh gotwi kiti chu Torah jieng toh jong kitekah a ahiye. Gotwi ahung lhah tieng hichu leiset a thil ahingthei jousen hinna a anei bang’a Torah jong leiset a ding’a hinna hi’a ahi. Chuna chungchon a gotwi jaal’a muchi-haichi amuonsa khat jong avel’a hung hingdoh a, leiset a kuon hung poudoh kit ji a ahiuve. Chuma bang’a mithisa ho jong khonung tieng Tal Torah mangcha’a P-thien in ahin kaithou kit diuva ahi. Chuti ahitoh kilhon a Hajkarat Geshamim – Mashiv Haruakh Umorid hageshem chu Birkat Tikhiyat Hametim khel-khel  a kisei a ahi. 

Chutichun Khazal ho’n Gemara le Midrashei Khazal mun tamtah a tuchung Parasha a kisun “ya’arof kamatar lik’khi” pansan in gotwi le Divrei Torah atekah uvin ahiuve.  Rabbi Bunim Mipeshiskha in hiche toh kisai hin mussar heskel phatah khat hitin eihil uve. Ama’n aseina a go ahung juh tieng mihem in ivet’a ahileh leiset in gotwi hochu achopkang sohkei a, gotwi khujat pichu mohseh’a tuolgo lai’a kibunglha dan a igel thei uva ahi. Nikho tamtah asun-ajat in velechun jong go hung juh jeh’a leiset chu akikhelna namoh mudoh lou maithei a ahiye. Hinlah chomkhat jou leh hiche gotwi ho jaal’a lei a kithe muchi-haichi hochu hung poudoh uva, hung kehdoh diu; amonsa dan’a nakoi muchi-haichi a kuon a chu hinna thah beleh hung doh ding a ahiye. 

Rabbi Bunim in aseina a divrei Torah jong chutima ahi. Mihem in P-thien thu kiti chu angai’a angai phot a ahileh tu-le-tu a mit’a muthei in ima kikhelna hin lhut hih jong leh nikho khat tieng gotwi kisei bang’a asung’a kuon hinna thah ahin pendoh sah tei ding a ahiye. Apoimo pen chu lunglhahdai pai-pai lou ding, gotwi in muntin ate bang’a P-thein thu chu ngai jing ding; chujongle aseiho’n jong lunglhadai lou’a sei jing ding, khangthah hung khanglen ding ho hil ding ti ahi. 

Ba’alei Mussar ho’n aseinauva Taona jong gotwi tobang ahi atiuve. Tu-le-tu’n mit a muthei ding in aga ima um nai hih jong leh taona kiti chu athon a kile aum ngeipoi. 

Eiho’n iseinuom uchu Yamim Noraim ho, P-thien lungset in boina beihiel in ihin palgalkai tauvin; Yom Kippur a ann ingol uvin, sun-nilhum in itao uvin, P-thien ivahchoi uvin ahi. Khazal ho’n aseinauva Rosh Hashana a ichungthu u kitan a; Yom Kippur a akhumkhana kisem a; Hoshana Rabba tieng ma’atafa – thulhuhna hochu itobang ahi ama-ama heng’a kithotdoh ji a ahiye. Chuti ahitoh kilhon a Hoshana Rabba chan’a hi gezerat din khelthei na phat-lemchang um nalai a ahi ti’n asei uve. (Hiche jeh’a Hoshana Rabba jaan tieng jaan khovah a limud kinei ji a ahi.) 

Chuti ahileh Yamim Noraim nikho hole Yom Kippur ni’a itaona houchu athon a akile ding tahsan aumpo’n; Chunglang Beit Din in Hoshana Rabbah a thulhuna ho ahin hopdoh tieng akoi jousen tukum a ding’a kipana-thupha ho bouseh ikisaan cheh diu ikinem uvin; Chuchena ding chun P-thien in iumna mun jouse uva phattehi eihin boh tauhen. 

       SHABBATH SHALOM LEKULAM