Tetzaveh, 5782
Le’ilui Nishmat Ya’akov Mate Ben Naomi, Avner Ben Avraham, Ngahlhing Bat Sarah ve’Shifra Bat Zimra. Tihyeh Nishmatam Tzrorah Bitzror Hakhayim
וְאַתָּה תְּצַוֶּה
Ve’attah tetzaveh…
(Chuleh nangma’n thu pe’n …)~ Shemoth 27:20
Khamisha Khumshei Torah sung’a parashiyot 54 holah’a Parasha 20 na, Parashat Tetzaveh a hin Moshe Rabbeinu min khatvei jieng jong akisun poi. Parashat Shemot a Moshe pen thu ahung kisut a kipat Parasha nukhah pen - Parashat Vezot Haberakha kichai gei’a Moshe Rabbeinu min chuonlouna Parasha umsun chu tuchung Shabbat a isim diu Parasha pahi ahi. Hiche toh kisai’a Mefarashim tamtah in dohna asem uchu “Ipi atileh Parashat Tetzaveh sung’a hi Moshe Rabbeinu min khatvei jieng jong kiphapohlou a ham?” tihi ahiye.
Hiche thudohna toh kisai hin Mefarshim ho’n donbutna tamtah apeuvin, chuche holah’a achallang 2 (akoi jouse’n jong ina jahkhah tei tahdiu) veu hiti’n, chuleh hiche teni’a kuon chun eihon jong dohna sem so’n kit uhitin, hilchetna tamlou peuhite.
Parashat Tetzaveh a Moshe Rabbeinu min khatvei jieng jong akisutlouna jeh chu:
#1. Amasapen a Moshe Rabbeinu hi Adar lha tarik 7 a peng’a chuleh hiche nikho ma’a hi aleiset hinkho anabei ah ahi. Chuleh hiche nikho lhunna hapta toh kimat’a kisim ji Parasha pahi kumseh tobang’a Parashat Tetzaveh hi ahikha ji’n ahi. Chuta Moshe Rabbeinu thina hapta ahitoh kilhon’a chuche hapta toh kitoh’a kisim ji Parasha pa’a chu amin khatvei jieng jong chuonglou ah ahitai.
#2. Anina a Am Israel te’n sana’a kuon bongnou lim asem uva, achonset jou u chun P-thien alunghangjah jieng in Am Israel te chu suhmang ding anagoi. Hinlah Moshe Rabbeinu atao in, P-thien heng’a hitin asei e “makheni na misifrekha asher katavta” (Nangma tah in nasut nalekhabu a kuon chun nei nuoimang in : Shemot 32:32 ven). Hilaiya sifrekha (ספרך ) hi sefer kha (ספר כ) ti’a jong simdoh thei ahi’n, hichu “lekhabu 20 na pa” ti’a jong lah thei ahi (chulhe chuche lekhabu 20 na chu Parasha 20 na, Parashat Tetzaveh hi ahiye). Ba’al Ha’Turim in aseina ah P-thien in Moshe Rabbeinu taona chu anasaang in, Am Israel te chonsetna chu anangaidam peh nai. Hijieng jong leh Tzaddik khat kamcheng’a kuon hung kondoh thucheng kiti chu apha hihen, gaosapna hitaleh P-thien in aguilhun sah thou thou a; Chutoh kilhon a Moshe Rabbeinu mi’n jong Parasha khat a kuon kiladoh ah ahitai.
Ahileh tu’n hilchetna masapa hi veleuhen, lungdon umtah khat mudoh thei aum e. Hichu ipi ham itileh Parashat Tetzaveh kisimna hapta chu Moshe Rabbeinu thina hapta toh akito man’a ipi atileh chuche Parasha a chu Moshe Rabbeinu min kiphapoh lou ah hintem? Athina hapta ahijeh tah-tah a chu Parashat Tetzaveh a chu amin chuong hen lang hileh kilomjo hilou ham? Tidan chu Torah thuhing pachu koima dang hilou’a Moshe Rabbeinu amatah in Am Israel te ding’a vaan a kuon ahin pohlhah a, chubep hilou’a hiche Torah jeh’a chu vaantil ho jieng toh jong gakidinte’a, ahinkho jieng jong achaanlo kigot a hilou ham? Chujong leh Torah hi P-thien jieng in jong “Torat Moshe avdi…” (Kalhacha Moshe Torah – Malachi 3:23 ve’n) ti’a aminvo a ahitah leh apenni le athini chuhna hapta’a kisim Torah simmun a chu amin kisutna Parasha ho kisim leh kilom ah hilou ham?
Hiche ithudoh uhi Harav Zalman Sorotzkin in alekhabusut Oznayim Latorah a anadong in hilchetna hoitah ape e. Ama’n aseina ah hiche a kuon a hi Khazal ho’n P-thien a tahsanna pa ichan a poimo’a chuleh tahsanna dihtah le thiengthou - “Emunat Israel Hatehorah” pachu itobang ham ti ei vetsah nuom jeh u ahi ti ahiye.
Oznayim Latorah in aseina ah namdang-jatdang le sakho dang ho ivet leh amaho ding’a apoimo pen le aloupipen chu sakho hin pandoh ho le chuche sakho toh kisai’a pan la ho ahiuve. Mikhat techu asakho u ivet leh anikho thieng’u le anikho poimo ho jouse’u huhhihngpu a agelpa’u toh kisamkai ngensen ahiuvin ahi. Apenni chu amaho ding’a ni poimo pen; athi nikho jong nikho poimo hikit – chuta chu amachu P-thien sang’a boltheijo le sangjo in agel uvin ahi. Hinlah Juda te’a vang chuti ahipoi. Thiemgao lah’a sangpen le vaan’a kuon Torah hin polha, Moshe Rabbeinu jieng jong chu ichan in loupi jieng jong leh amachu P-thien in “amanchah ahi” tikhel chutilom a kitumbol’a, kidomsang’a a kiloupi sah dehlou ah ahiye. Chubep hilou’a apenni le athini toh kitoh hapta pa jieng’a jong chu Shabbat toh kitoh’a kisim ji Parasha jieng’a jong amin kiphapohlou ah ahitai.
Ravpa’n aseina ah Khazal ho’n eihil nuom uchu P-thien a tahsanna dihtah le thiengthou kiti chu chutobang chu ahingai ah ahiye ti ahi. Achungnung pen’a P-thien chu koi jing ding, amachu amasapen le anukhahpen hisah jing ding; Torah sung’a thu kisun ho jouse jong P-thien amatah in ahinsut a, abul a kipat achaina gei amakhutsoh bouseh ahi ti a tahsanna thiengthou tah nei ding ti ahi. Hiche ho jouse chu Moshe Rabbeinu thina hapta toh kitoh Parasha pa hung kisim a, amin khatvei jieng jong kisutlou pa’a kuon a chu athah beleh a kigeldoh kit ji’a, Torah thuhing eihin pe’uva hatchungnung P-thien a tahsanna chu avel’a kikiphutdet kit ji ah ahiye.
Ahileh tu’n chunglang’a hilchetna ipeh lah uva aninapa veleu hen. Khet Ha’egel jou’a Am Israel te kisuhmanglouna ding’a P-thien heng’a Moshe Rabbeinu atao’a chu ipi asei em, “makheni na misifrekha asher katavta” ti’n Am Israel te nasuhmang ding leh nalekhabu thieng a kon nei nuoimang in ti’n asei in ahi. Chutichun P-thien in jong Moshe Rabbeinu taona chu asaang in, Israel chate chu anasumang tapoi.
Hilai mun’a kushiya dohthei, hetthiem hahsa tah khat chu ipi lung agel’a Moshe Rabbeinu chun Am Israel kisuhmanglouna ding’a chu “makheni na misifreka asher katavta” ti’a asei hintem? Thildang-dang pansan a, Am Israel te kisuhmanglouna ding chu athum theilou a ham? Tekahna Am Israel te nasuhmang ding leh keijong nei sumang in, ahilou leh Am Israel te nasuhmang sang in ka-zkhut jouse le Olam Haba a kipaman kakisaan ding ho jouse sumang in lang, chuche khel chun Israel chate hinghoi in… ti’a thil tamtah aseithei hilou ham? Ipi thu um’a “ Nangma tah in nasut nalekhabu a kuon chun nei nuoimang in “ ti’a Am Israel te suhmang’a aumlouna ding’a chu tao khel-khel ah hintem?
Hiche kushiya hilchetna chet tiding ham, Mefarshim ho’a kuon kasimdoh nai po’n (ahilchetna chu um tei ding ahi hinlah ihetna lhahsam jeh leh lekhabu akilhom sim nahlai jeh’a kisimdoh khalou lai hitei inte). Hijieng jong leh tunaicha chun besiyata dishmaya, chunglang’a kuon keimatah khidush eihung kipe dungjui in hilchetna hin pe kigo ing kate, kasei khah tah’a ahileh P-thien in eiho jouse phatthei eiboh u hen lang, chuleh adehset’a kanao aneopen Tiferet Bat Nirit (hapta kit a jinei ding ahita’n, tuchung Shabbat hi ama ding’a Shabbat Kallah ahitai) akieng-nei na mun’a ahung vangphatna ding le eiho Juda te chondan le Torah le Mitzvot ho toh kitoh’a insung ahin semdohna ding in P-thien in Torah sung’a kisun phattheina jouse toh hin phungvuh hen.
Gemara Masechet Gittin 36b mun hihen Midrashim ho ivet leh Khazal ho’n Khet Ha’egel a Am Israel te chonsetna chu “numei ajineina kin umna,a khupah mun’a ajipa hilou pasal dang toh zong” toh atekah uve. Hichu ipi kiseina ham itileh Mefarshim ho’n aseinauva Sinai Muol’a P-thien ahung kilah’a Torah ihung peh uchu adang ahipo’n chulai mun’a chu P-thien in Am Israel techu aji ding’a ahung kichenpi a, Ketubah ding’a Torah chu ihung peh uva ahiye. Thiemgao ho lekhabu le thuseiho ivet jong leh mun tamtah’a Am Israel te leh P-thien kikah’a kiguijopna chu ba’al le’Isha – Pasal le Ajinu bang in akisei in, tekahna Shir Hashirim bang khu P-thien le ajinu, tichu Am Israel te kah’a kilangle’tona ahi’n ahi.
Ahileh chuche Khatuna umna mun, Sinai muol’a chu Am Israel te’n ipi abol uvem? Sana a kisem bongnou lim anahou tauvin ahi. Chutobang’a thet umtah thil abol uchu Khazal ho’n numei khat ajineina khupa mun a pasal dang toh zong’a atekah uvah ahi.
Ahileh Moshe Rabbeinu hung kile’a chu ipi abol em? Suongpheng teni chu asep se’n; Sana’a kisem bongnou chu mei in agou in, chuleh agoibuong in, twi-dung’a chun alehlut in, Am Israel techu atwi anadon sah e (Devarim 9:21 ve’n). Mefarshim ho’n aseinauva Moshe Rabbeinu in Am Israel teho chu chulai mun’a chu Sotah twi anadohsan a ahiye ti’n asei uve.
Langkhat a Sotah twi kiti chu ipi kiseina ham itileh, ihetsa ma bang uva Beith Hamikdash anadin laiya chu Pasal khat in ajinu chu midang toh aginmo tah’a ahileh Beith Hamikdash mun’a Kohen ho heng’a ahin pui ding, chuleh chulai mun’a chuche sotah twi pachu anadonsah jiuva ahi. Hiche sotah twi lah’a chu ipi jao em itileh P-thien minthieng kisutna klaf chu kidii lut’a, twi’a chu P-thien minthieng chu anakisumang ji ah ahi.
Hetding chu P-thien minthieng suhmang ding kiti hi Isur De’oraitah lah’a khat ahi. Tulai jieng a jong P-thieng minthieng kisutna thil ho jieng jong jaana neitah’a kibol’a, munkhat tou’a P-thien minthieng Yud, Kei, Vav, Kei bang chu aum khah leh noimang ding phallou ah ahinalaiye. Ahileh hiche Isur De’oraitah chu ipi ding’a Sotah Twi chungchang’a chu kiphal ham? Ajehchu Khazal ho’n aseinauva P-thien in hitin asei e, “nupa kikah’a kitona ding le Shalom Baith umna ding ahipou leh ka-minthieng jieng jong nuoimang ding khoh kasapoi” ti ahi.
Ahileh tu’n i-kushiya pa uva chun nunglut kit taleuhen. Khet Ha’egel chungchang’a thilsoh ho jong chu ivet leh “numei ajipa aang’a zong” tobang hita, chuna ban’a nupa kikah’a Shalom Baith pachu keh toh thakhat ahitai. Tichu P-thien le Am Israel te kikah’a Shalom Baith chu keh ah ahita’n ahi. Chuleh thilsoh hochu Sotah chungchang tobang ahitah toh kilhon a Moshe Rabbeinu in jong Am Israel te chu chulai mun’a Sotah twi anadohsah a, chonsetna nei le neilou ho, tichu P-thien masang’a zong ho le P-thien ding’a kitah-tah’a pang hochu analhekhen ah ahiye.
Ahileh nupa kikah’a kiginmotona ahung umtah’a, Shalom Baith chu keh ding ahitieng P-thien in ipi abol em? Shalom Baith umna ding ahipouleh “kamin thieng kisuhmang ding jong khoh kasapoi” ti’n asei e. Chuti ahileh P-thien le Am Israel kikah’a Shalom Baith umna ding’a chu Moshe Rabbeinu in ipi abol ngai em? Talmid lomed mi’rabbo – Talmid kiti chun a Rav pa’a kuon ajildoh ji ah ahi kitima bang’a Moshe Rabbeinu in jong a Rav pa – P-thien amatah, likvodo be’atzmo a kuon a chu ajildoh a, P-thien heng’a “makheni na misifrekha asher katava” ti’a asei ah ahiye.
Henge, Am Israel te kisuhmanglouna ding’a P-thien heng’a Moshe Rabbeinu atao’a chu thildang-dang jong asei’a, Am Israel te’a ding’a athumthei ah ahinai. Hinlah thilsoh holeh thil umdan ho avet’a ahileh Moshe Rabbeinu in amuchu P-thien le Am Israel te kikah’a thilsoh chu Ba’al le’Isha – nupa kikah a boina, Shalom Baith toh kisai ahitai ti ahi. Ahileh chutobang dinmun a chu ipi bol’a Shalom Baith pachu semphat thei ding ham itileh Moshe Rabbeinu in P-thien a koun ajildoh bang’a “makheni na misifrekha asher katavta” tichu ahiye. Chutichun P-thien in Moshe Rabbeinu taona chu anasaang in, Am Israel te chu anasumang tapo’n, akikah lhon’a Shalom Baith keh ding lai jong semphat in anaum kit e.
SHABBATH SHALOM LEKULAM
