Yossi Lhungdim
Le'ilui Nishmat Avidan Chongloi ben Avraham Rivkah Khongsai Bat Sarah. Tihyeh Nishmatam Tzrorah Bitzror Hakhayim
Le'ilui Nishmat Avidan Chongloi ben Avraham Rivkah Khongsai Bat Sarah. Tihyeh Nishmatam Tzrorah Bitzror Hakhayim
שֵׁשֶׁת יָמִים תֵּעָשֶׂה מְלָאכָה וּבַיּוֹם הַשְּׁבִיעִי יִהְיֶה לָכֶם קֹדֶשׁ שַׁבַּת שַׁבָּתוֹן
Sheshet yamim te'aseh melakha uvayom hashevi'i ihyeh lakhem kodesh Shabbat shabbaton…
(Nigup sung naa kitong ding, nisagi ni ahileh vang nangho ding'a Shabbat shabbaton hiding …) ~ Shemoth 35:2
Juda khat hinkho a hin Mitzvot poimo tamtah um jong leh hiche holah'a poimo dehset tithei chu Mitzvat Shabbat – Shabbat nikho ahiding bang'a nit a, Shabbat toh kisai daan-le-moul ho jouse phatecha jui a suhbulhit ding tipa hi ahiye.
Tuchung Parasha (tukum hi Shanah me'uberet ahilou toh kilhon a Parasha ni – Vayakhel le Pekudey kisim kop ah ahi) a hin Mishkan hung kisah pat le akitundoh thu akisun in. Chu jong leh Parasha kipatna ah hin Moshe Rabbeinu in Am Israel te akoukhom a, ajah uva Mishkan sahna ding'a poimo thil ho ahintuo khom diu, chule Mishkan sahna ding'a toh-kihop ding daan ho asei peh thu akisun e – Betzal'el le Ohaliav in alamkai ding chule adang dang….
Langkhat ah Moshe Rabbeinu in Am Israel techu Mishkan sahna ding toh kisai hetlou'a poimo thil ho seipeh ding ti'a akhop khom hijieng jong leh chuche ho aseipeh ma'in Shabbat nikho loupi dan le poimo dan pa asei peh masa'n ahi.
Chukit leh hiche nikho, tichu Moshe Rabbeinu in Am Israel te akoukhom nikho hi Rashi Hakadosh in Parashat Vayakhel bulpatna "Vayakhel Moshe…" kiti mun "biur" apehna a "Moshe muol a kuon ahung kumlhah jou, Yom Kippur nikho jing a" Am Israel techu akhopkhom a tuchung Parasha bulpatna a kisun thu hohi aseipeh ah ahi ti ahi.
Mefarshim tamtah in adoh u chu ipi atileh hiche Mishkan sahding thupeh pahi Moshe Rabbeinu in Yom Kippur nikho jing'a chu Am Israel te aseipeh khel khel ngai aham? Chukit leh ipi ding'a Mishkan sahna ding toh kisai thupeh ho aseima'a Shabbat nikho poimo dan asei masat hintem? Ipi ham Shabbat, Yom Kippur le Mishkan ho kimatna???
Mefarshim ho'n aseinauva ajehchu Shabbat, Yom Kippur le Mishkan hose hin kibahna khat anei uva ahi. Hichu ipi ham itileh chonset ngaidam pa ahiye. Shemoth 35:21 ivet leh Mishkan hi "Mishkan Ha'eduth" – eipao a isei ding leh hettohsah ponbuh ti'n ah akiminvo in; Hichu ipi hettohsah a pang ham itileh Rashi'n aseina'a "bongnou lim semthu ahou jeh uva achonsetna pau" P-thien in angaidam e ti hettohsah a pang ah ahiye ti ahi.
Chukit leh Yom Kippur ahikit leh ihetsa ma bang uva hiche nikho hi kum khat sung'a ding'a nikho thiengthou pen; hiche nikho a hi P-thien in Am Israel te chu achonsetnau angaidam peh ji'a, chule hiche nikho a hi Am Israel te chu asopthieng ji ah ahi. Chubep hilou'a Am Israel te'n Bongnou Lim ahou jou uva chu Moshe Rabbeinu Sinai muol'a 2 vei jen gakaltou kit a ahi'n. Am Israel te ding'a P-thien heng'a ngaidam agathum a, ataona pachu P-thien in hiche Yom Kippur ni'a hi ahin saanpeh ah ahiye.
Shabbat ahikit leh Khazal ho'n Masechet Shabbat 118b a aseima bang uva Juda khat chun Shabbat nikho ahiding bang tah'a anit a ahileh Enosh khang bang in milim semthu hou ta jong leh achonsetna jouse kingaidam peh ding ah ahi. Chukit leh Khazal ho'n aseinauva Shabbat loupi dan chu Mitzvat Shabbat pahi Mitzvah dang jouse toh kibang ah ahi atiuve. CHuleh hiche toh kilhon a chu Mikhat in Shabbat anitlou'a, lhangphong tah'a apalkeh tieng amachun Torah pumpi sim-le-tai a aneilou toh thakhat hi ah ahi atiuve.
Chukit leh Shabbat poimo dan chu tuchung Parasha akuon a jong mudoh thei ahi. Mishkan kiti chu aloupi dan ingaito a ahileh Am Israel te chun Mishkan chu asah uva ahileh hiche a kuon a chu P-thien alah uva hung cheng ding ti ahi. Hinlah itobang in hiche Mishkan sahding hi poimo jieng tajong leh I Parasha uva Shabbat thu hung kisun hin ipi ihung hil uvam itileh Mishkan kiti chu iti loupi hen lang hijong leh Mishkan sahna ding'a Shabbat palkeh phal ahipoi tipa chu ahi.
Shabbat loupi dan hi tamtah seithei um jong leh tuchung Parasha a kuon mudoh thei khat chu Parasha kipatna lang ivet leh Torah in ni 7 ni hi Shabbat bep hilou in "Shabbat shabbaton…" ti'n aminvo in ahi. Hilai mun bep hilou in Parashat Ki-Tissa ( Shemot 31:15 ) le Parashat Emor (Vayikra 23:3 ) teni'a jong Torah in "Shabbat shabbaton" ti'n aminvo kit in ahi.
Hinlah hetding chu Torah sung'a Shabbat thu kisutna mun jouse a ni 7 ni hi "Shabbat shabbaton" ti'a kiminvo sohkei lou ah ahiuve. Khatvei vei tieng Torah in Shabbat bouseh ahin man kit ji ah ahi. Chuti ahileh ipi ti dan a Torah in ni 7 ni jouse chu Shabbat Shabbaton ati jieng lou a, khatvei vei tieng Shabbat bouseh a aminvo ji ahidem?
(Shabbat Shabbaton hi English a iledoh le "A Shabbat of complete rest…" ti ahi. Hichu eipao a sei ding hitaleh kicholdo nikho bep hilou'a thiengsel a kicholdo nikho ti ding dan ahi. Akikhehna chu Shabbat bouseh akiti tieng kicholdo hijieng ah ahi. Hiche a kuon mudoh thei chu Shabbat Shabbaton kiti pahi athienthouna lenjo ah ahiye.)
Ha'Gaon Rabbi Dov Ber Rapaport in hiche ithudoh uhi adong in, hitin hilchetna ape e: Masechet Berachot 35b a hitin akisun e,"Israel te'n P-thien thu angai uva, P-thien lungdei lam pa bou abol tieng uleh namdang ho'n amaho kin jouse abol peh diu ahi". Chumabang a Am Israel te achonphat uva, P-thien lungdei lam pa bou chu abol tieng uleh namdang ho'n atoh-atham diu jouseu abolpeh tah ding u. Chutoh kilhon a ni 6 sungse chu amaho'n ima abol u ngai talou ding; Torah bou a akidii jing ding uva ahitai. Chutieng chuleh ni 7 ni bep hilou a ni 6 hose jong chu Shabbat bang'a kicholdo nikho hiding, chuti'a chu ni 7 ni chu Shabbat – choldo ni bep hilou a Shabbat Shabbaton – thiengsel a kicholdo nikho hiding ah ahita'n ahi.
Hinlah langkhat a Am Israel te chu chung'a apa u, P-thien lunglam toh kitohlou'a achon kalse'u, akihinso na ding uva poimo toh-le-tham hochu amaho tah in akitoh u ngai tading. CHutieng chu leh ni 6 sungse naa atoh uva, kisaboi uva, hiti'a chu ni 7 ni bou le chun kicholdo diu; Chuti a chu ni 7 ni jong chu Shabbat – kicholdo ni bou hiding ah ahita'n ahi.
Shut Maiyim Khayim in hiche Harav Dov Ber Rapaport hilchetna pahi agilcheh iti diu ham, hilchetna apeh be na'ah hitin asei e: Ahileh Harav Dov Ber Rapaport hilchetna hi hoi'a kuon mudoh thei em? Tuchung parasha hihen, Parashat Ki-Tissa le Parashat Emor hitaleh ni 7 ni Shabbat Shabbaton kitina mun ho veleuchun " ni 6 sung naa natoh diu…" akiti lheng in " Ni 6 sung naa kitong ding…(Hebrew a Sheshet yamim te'aseh melakha…) kiti sohkei ding ahi. Hinlah Ni 7 ni Shabbat bou kitina ho vekit leuchun "Ni 6 sung naa natoh diu…" ti'a kisun ding ahi. (vetsahna a Parashat Yitro, Shemoth 20:9 veleuchun "Sheshet yamim ta'avod ve'asita melakhtekha veyom ha'shivi'I Shabbat la'Ad-nai…").
"Ni 6 sung naa natoh diu…" kiti hi Am Israel te'n P-thien lunglam abollou tieng uleh amaho tah in naa atoh diu kiseina ahi'n. Hitobang dinmun a chu Torah in Shabbat Shabbaton tilou'a, Shabbat bouseh a aminvo ji ah ahita'n. Hinlah langkhat a (tuchung parasha bang'a) "Ni 6 sung naa kitong ding…" kiti hi Am Israel te P-thien lunglam toh kitoh a achon uva ahileh ana'u chu namdang ho'n ahung toh peh diu – tichu "naa kitong ding..", chutoh kilhon a chu nikho jouse Shabbat tobang hi'a, chutieng chuleh ni 7 ni jong Shabbat Shabbaton – thiengsel'a kicholdo nikho ti'a Torah in aminvo ah ahitai.
SHABBATH SHALOM LEKULAM
